من أجلك حافظي علي نفسك

_بقولك يا نهى فيه هكر بيهددني بـِ صوري أعمل اي أنا خايفة أوي

_وهو هيجيب صورك منين!

_بت صحصحي معايا بقولك هكر يعني طبيعي هكر الفون واخد الصور

_وليه منقولش مثلًا دي الصور إللِ أنتِ بتنزليها استوري وبتحطيها غلاف ياما نَصحتك وقولتلك بلاش صورك تنزليها على المواقع

_يووووه ياستي بلاش تسمعيني دروس دلوقتي وقوليلي لو هو فعلًا واخدهم مِن استوري أو مِن الغلاف هيهددني بيهم إزاي أو هيهددني بيهم ليه ماهم موجودين وأي حد بيشوفهم اي الجديد يعني

_طبيعي إنه مش هيفهمك كدا وإنه يفهمك إنه أخدهم مِن فونك ذات نفسه علشان يعرف يبتزك بيهم

_طب والعمل أنا خايفة أوي وأهلي لو عرفو مش بعيد يقتلوني

_اممممم نفكر أكيد هنلاقي حل

_لقيتها

_اي بقا إللِ لقتيها

_هكلم محمد وهو يتصرف معاه

_ومحمد هيساعدك!

_وليه لا مش المفروض هو الإكس بتاعي؛ فهو يتصرف

_بس خليني أقولك إنه مُرتبط بيكِ بس يعني مش خطيبته ولا مراته علشان يتصرفلك في مشكلة زي دي

_نهى أنتِ بتقفليها في وشي ليه!

_مش بقفلها في وشك بس بوريكي كل الإحتمالات علشان متتصدميش لو اتهرب منك

_لالا مستحيل يعملها هو بيحبني

_طيب اشطا كلميه وشوفي هتعملِ اي وأنا همشي دلوقتي باااي

مشيت نهى مِن عندي بعد ما قفلت كل السكك في وشي بس حاسة إن محمد هيساعدني أكيد يعني هو مش هيشوفني واقعة في مشكلة ويسبني أيوة أيوة هو بيحبني وأكيد هيساعدني

جبت الفون بتاعي إللِ أنا بقيت خايفة أمسكه وخايفة أعمل عليه أي حاجة لمجرد بس إني عرفت إني اتهكرت وإن في حد بيتجسس عليا بس المهم أكلم محمد دلوقتي وبعدها أشوف هعمل اي

_ألو

_ألو يا محمد إذيك

_الله يسلمك يا أميرة

_أنت فين مش باين مِن امبارح

_أنتِ عارفة إني في الشغل ووقت الشغل مبكونش فاضي

_اشطاا يا قلبي كنت عايزة أقولك على حاجة

_قولي

_صراحة أنا واقعة في مشكلة وعايزاك تساعدني فيها

_واي هي المشكلة!

_في واحد كلمني مِن رقم فيك وبعتلي كذا صورة ليا وهددني بيهم وأنا مش عارفة أعمل اي

_معلش يعني بس هي فين المشكلة يا أميرة أنا مش شايف مشكلة